ပရိသတ်တွေဟာ ကိုယ်ချစ်တဲ့ အနုပညာရှင်တက်မယ့်ပွဲအတွက် ပွဲလက်မှတ်တွေ အလုအယက်ဝယ်ကြတာပုံမှန်ပါပဲ။လက်မှတ်ဝယ်တဲ့အခါ ကိုယ် Idol မျက်နှာလေးကို မြင်ချင်စိတ်နဲ့ ရှေ့ဆုံးတန်းကလက်မှတ်တွေကို ဝယ်တတ်ကြတာလည်း ပုံမှန်ပါပဲ။ဒါပေမယ့် မနေ့ညကတော့ Xiao Zhan ရဲ့ ပရိသတ်တွေဟာ Xiao Zhan တက်မယ်လို့ ကြိုတင် confirm ထားခြင်းမရှိတဲ့ ပွဲအတွက် လက်မှတ်တွေကို Fan Club ရဲ့ အကူအညီမပါပဲ တစ်ဦးချင်းစီကနေ ခက်ခက်ခဲခဲဝယ်ယူခဲ့ကြပါတယ်။ဒါ့အပြင်မမြင်ရတာကြာတဲ့ မျက်နှာလေးကို မြင်ရဖို့ရှေ့ဆုံးခုံတွေ ရွေးမဝယ်ပဲ သူတို့ရဲ့ banner တွေကိုXiao Zhan စင်ပေါ် ကလှမ်းမြင်ရအောင် နောက်တန်းကခုံတွေကို ဦးစားပေးပြီးဝယ်ခဲ့ကြပါတယ်။

“ငါတို့ Zhan Ge ကိုမမြင်ရရင်နေပါစေ Zhan Ge တော့ငါတို့ကို မြင်ရအောင်ပါ”

“Xiao Zhan ပွဲမတက်လို့သူ့ကိုမမြင်ရလည်းကိစ္စမရှိပါဘူး…Xiao Zhan ပွဲတက်ပြီး အနားမှာ ငါတို့မရှိမှာကြောက်တာ”
“Zhan Ge အတွက် Red Ocean ကြီးတစ်ခုနောက်တစ်ကြိမ်ဖန်တီးပေးချင်တယ်”

“ငါတို့ သူ့အတွက် အမြဲရှိနေတယ်ဆိုတာ သူ့ကိုသိစေချင်တယ်”

XFX တွေရဲ့စစ်မှန်တဲ့ အချစ်တွေကြောင့် သူတို့တွေရဲ့ဆုတောင်းဟာ ပြည့်ခဲ့ပါတယ်။ပွဲတွေမတက်တာကြာပြီဖြစ်တဲ့ ကောင်လေးဟာ ခရမ်းရောင် နဲ့မီးခိုးရောင် စပ်ထားတဲ့ Lavender Suit လေးနဲ့ အနီရောင်ကောဇောပေါ် ခန့်ခန့်ညားညားလျှောက်ပြီး ပရိသတ်ဆီပြန်လာခဲ့တာပါ။Xiao Zhan ရဲ့Red Carpet ပေါ်စတိုင်ကျကျလျှောက်နေပုံနဲ့ လက်မှတ်ထိုးဖို့ marker pen ကိုလှမ်းယူပြီး မှင်ထွက်လာအောင်ခေါက်တဲ့ ပုံစံလေးက အစ ဆွဲဆောင်မှုရှိလွန်းလို့ ချက်ချင်းကို Weibo Hot Search 1 အထိရောက်ခဲ့သေးပါတယ်။

Xiao Zhan ဟာစင်ပေါ်မှာ The Oath of Love Theme song ကို တွဲဖက်မင်းသမီးလည်းဖြစ် စီနီယာသရုပ်ဆောင်တစ်ယောက်လို့လည်း ပြောလို့ရတဲ့ Yang Zi နဲ့ အတူဖျော်ဖြေဖို့Stage ပေါ်ကိုတက်တက်လာချင်းမှာမြင်လိုက်ရတဲ့ ကွင်းနဲ့အပြည့် Red Ocean ကြီးကြောင့် မျက်ရည်ဝဲပြီး ပြုံးနေခဲ့ပါတယ်။သီချင်းဆုံးတဲ့ အခါမှာတော့ တွဲဖက်သီဆိုတဲ့သူကို respect ပေးတဲ့အနေနဲ့Yang Zi စင်ပေါ်ကဆင်းသွားတဲ့အထိ စောင့်နေခဲ့ပြီး The Oath of Love ရဲ့ ost song တစ်ခုဖြစ်တဲ့ “The Luckiest Fortune” ဆိုတဲ့ သီချင်းကို သူရဲ့ ချိုမြကြည်လင်တဲ့ အသံလေးနဲ့ သီဆိုခဲ့ပါတယ်။အဲ့ဒီသီချင်းကို ဆိုနေရင်းနဲ့ ပရိသတ်ဘက်ကိုလည်း ညွှန်ပြခဲ့တာကြောင့် သူ့အတွက်အကောင်းဆုံးကံလေးဟာ သူ့ကိုချစ်တဲ့ပရိသတ်ပါလို့ ပြောနေသလိုပါပဲ။ပွဲမှာလည်း The Oath of Love နဲ့ပက်သက်တဲ့သီချင်း သုံးပုဒ်တောင်ဆိုသွားခဲ့ကြတာမို့ The Oath of Love ဟာမကြာခင်ထွက်လာတော့မယ်လို့ သဲလွန်စပေးနေသလိုပါပဲ။

ပွဲရဲ့ နောက်ဆုံးပိုင်းနားလောက်ရောက်တဲ့ အခါမှာတော့ လကမ္ဘာပေါ်ကဆင်းလာတဲ့ မင်းသားလေးလိုကြည်လင်ခန့်ညားတဲ့ အသွင်နဲ့ အဖြူနဲ့အနက်ကိုစပ်ထားတဲ့ Dark Floral White Suit ကိုဝတ်ဆင်ပြီး Tencent VIP star award ဆုကို တက်ယူခဲ့ပါတယ်။Tencentရဲ့ ဆယ်နှစ်တာအတွင်း ကြယ်တစ်ပွင့်အနေနဲ့ပါဝင်ခဲ့ရတာ ဂုဏ်ယူတဲ့အကြောင်း ဆက်လက်တောက်ပသွားပြီး ကိုယ့်တာဝန်ကိုယ်ယူရင်း အကောင်းဆုံးအနုပညာတွေဖန်တီးသွားမယ့် အကြောင်း ယုံကြည်ချက်တွေပြည့်နေတဲ့ ကျေးဇူးတင်စကားကိုပြောခဲ့ပါတယ်။အဲ့ဒီအချိန်မှာ Xiao Zhan ရဲ့နာမည်ကို အော်ပြီး အားပေးနေတဲ့ ပရိသတ်တွေရဲ့အသံဟာ တစ်ကွင်းလုံး လွှမ်းသွားခဲ့ပါတယ်။
တနင်္ဂနွေရဲ့ Tencent star Night ဟာ Xiao Zhan နဲ့ သူ့ကို ချစ်တဲ့ ပရိသတ်တွေအတွက်တော့ တကယ့်ကို မှော်ဆန်တဲ့ညလေးဖြစ်ခဲ့ပါတယ်။

ပွဲပြီးတဲ့အခါမှာလည်း ပရိသတ်တွေဟာ သဘာဝပတ်ဝန်းကျင်ထိန်းသိမ်းရေးလုပ်နေပြီး အမှိုက်ကို အမြဲစနစ်တကျပစ်တတ်တဲ့ ကောင်လေးရဲ့ စကားကိုနားထောင်ပြီး ပွဲထဲက အမှိုက်တွေကို ကောက်ပြီးမှ အိမ်ပြန်ခဲ့ကြပါတယ်တဲ့။
“ငါတို့အတူတူ ပိုကောင်းတဲ့လူတွေဖြစ်အောင်ကြိုးစားကြမယ်
အပြန်အလှန်ဂုဏ်ယူစရာအဖြစ် ရပ်တည်ကြမယ်”
ဆိုတဲ့ Xiao Zhan နဲ့ သူ့ရဲ့ပရိသတ်တွေကြားက ကတိဟာဘယ်တုန်းကမှ အပြောချည်းသက်သက် မဟုတ်ခဲ့ပါဘူး။