ဒီရက်ပိုင်းက စာမေးပွဲ ကာလလည်း ဖြစ်တယ်။ စာမေးပွဲတွေလည်းနီးလာပြီဆိုတော့ ပြင်ဆင်သင့်တာလေးတွေကို တင်ဆက်ဖော်ပြပေးလိုက်ပါတယ်။

စာတွေကိုစုပါ
စာမေးပွဲဖြေနိုင်ဖို့ ပထမဆုံး အရေးကြီးတဲ့ အချက်က သင့်ဆီမှာ စာတွေအပြည့်အစုံရှိဖို့ လိုအပ်ပါတယ်။ အဲ့ဒါကြောင့် စာတွေအပြည့်အစုံ ရှိအောင်လိုက်စုပါ။

အချိန်ကိုသေချာစီမံခန့်ခွဲပါ
စာမကျက်ခင် တစ်နေ့တာ ချင်းစီအတွက် အချိန်ဇယား ပြုလုပ်ပါ။ တစ်ဘာသာချင်းစီအလိုက် အချိန်ဇယား ပြုလုပ်ပါ။ စာကျက်ပြီးလို့နားသင့်တဲ့အချိန်ဆို ဖုန်းသုံးခြင်း မပြုလုပ်ပဲ သေချာ အနားယူပါ။ မျက်လုံးကို သေချာအနားပေးပါ။

စာလုပ်ဖို့ အကောင်းဆုံးနေရာကို ရွေးချယ်ပါ
တစ်ယောက်နဲ့တစ်ယောက် စာကျက်ပုံချင်း မတူကြသလို အာရုံစိုက်ပုံ ချင်းလည်းမတူကြပါဘူး။ သင်က တိတ်ဆိတ်မှ စာကျက်တတ်တဲ့သူဆိုရင် ကိုယ့်ကို ဘယ်သူမှ အနှောက်အယှက်မပေးနိုင်တဲ့နေရာကို ရွေးချယ်ပါ။ သင်စာကြည့်မယ့်စားပွဲပေါ်မှာ ရှင်းလင်းအောင်ထားပါ။ သင်ကျက်မယ့် ဘာသာရပ်နဲ့သက်ဆိုင်တဲ့ စာအုပ်စာရွက်တွေပဲထားပါ။ ရှင်းရှင်းလင်းလင်းနဲ့စာလုပ်တာကလည်း စိတ်ကိုကြည်လင်စေပြီး အလွယ်တကူကျက်မှတ်နိုင်ပါတယ်။

အရေးကြီးတာတွေကိုပဲ အာရုံစိုက်ပါ
စာကျက်နေစဉ်အတွင်း ဖုန်းအသုံးပြုတာကို လုံးဝရှောင်ကြဉ်ပါ။ တစ်ဘာသာကို တစ်နာရီဆိုပြီး သတ်မှတ်အချိန်ပေးထားရင် တစ်နာရီလုံး ပြည့်အောင် အာရုံစိုက်ပြီး ကျက်မှတ်ပါ။ စာမေးပွဲပြီးမှ သင်လုပ်ချင်တာ (ဖုန်းသုံးတာ၊ ဂိမ်းဆော့ကစားတာ) ကို စသဖြင့် စိတ်ကြိုက်လုပ်ပါ။

မေးခွန်းဟောင်းတွေဖတ်ပါ
အချိန်တိုအတွင်း ရှိသမျှစာတွေ အကုန်ကျက်မှတ်ဖို့ဆိုတာ မလွယ်ကူပါဘူး။ အဲ့တာကြောင့် မေးခွန်းဟောင်းတွေဖတ်ပြီး မေးနိုင်တဲ့ စာတွေကို ဦးစားပေး ကျက်မှတ်ပါ။ ပြီးမှ အရေးမကြီးလောက်ဘူး ထင်တဲ့စာတွေကို မှတ်ပါ။

မှတ်စုပြုလုပ်ပါ
ကျက်ထားသမျှစာတွေကို အကျဉ်းချုပ် မှတ်စုတွေ မှတ်ထားပါ။ စာမေးပွဲနေ့မရောက်ခင် စာတွေပြန်နွှေးရင် လွယ်လွယ်ကူကူ ပြန်လည်မှတ်မိနိုင်ပါတယ်။

ဖြတ်လမ်းနည်းသုံးပြီးကျက်မှတ်ပါ
တစ်ခါတလေ စာတွေက ရှုပ်ထွေးလာပြီဆိုရင် သင့်ကိုယ်ပိုင် ကဗျာလေးတွေ သီချင်းပုံစံလေးတွေ ပုံပြင်ပုံစံလေးတွေ ထွင်ပြီး ကျက်မှတ်ကြည့်ပါ။ ဒီနည်းလမ်းက စာကျက်ရင် ပိုမှတ်မိနိုင်သလို ပျော်စရာကောင်းပြီး အချိန်တိုတို အတွင်း စာတွေကျက်မှတ်နိုင်ပါတယ်။

သူငယ်ချင်းတွေနဲ့ စာဆွေးနွေးပါ
တစ်ခါတလေ တစ်ယောက်တည်း စာကျက်ရတာ ငြီးငွေ့ပြီး ပျင်းစရာ ကောင်းပါတယ်။ သင် ပိုင်နိုင်တဲ့စာ ကို သူငယ်ချင်းတွေကို ပြန်လည်ရှင်းပြတာမျိုးဖြစ်ဖြစ် လုပ်ရင် စာတွေ ပို မှတ်မိနိုင်ပါတယ်။ သင့်အတွက် ခက်ခဲတဲ့စာတွေကို လည်း သူငယ်ချင်းတွေနဲ့ ဆွေးနွေးကျက်မှတ်ပါ။

အာဟာရဖြစ်အောင်စားသောက်ပါ
စာမေးပွဲအချိန်အတွင်း ကျန်းမာရေးက အရေးကြီးဆုံးပါပဲ။ နေမကောင်းဖြစ်ရင် စာတွေကို အလွယ်တကူ မကျက်မှတ်နိုင်တော့ပါဘူး။ အဲ့တာကြောင့် ကျန်းမာအောင် နေထိုင်စားသောက်ပါ။

အိပ်ရေး၀၀အိပ်ပါ
အိပ်ရေးမဝရင် မှတ်ဉာဏ်အားကို လျော့စေပါတယ်။ စာတွေအများကြီး ကျက်မှတ်ထားပြီး မေ့သွားရင် အရမ်းကြေကွဲစရာကောင်းပါတယ်။ အဲ့တာကြောင့် ကျက်ထားတဲ့စာတွေ မမေ့လျော့သွားအောင်၊ စာတွေကို လွယ်လွယ်ကူကူကျက်မှတ်နိုင်အောင် ညဘက်ဆို အိပ်ရေး၀၀အိပ်ပါ။

ကဲ……. စာမေးပွဲမှာ အမှတ်ကောင်းကောင်းရဖို့ ဖြေဆိုနိုင်အောင် အပေါ်က အချက်လေးတွေအတိုင်း လုပ်ကြပါနော်။