Kdrama ချစ်သူပရိတ်သတ်ကြီးတို့အတွက် ဇွန်လထဲမှာ ထုတ်လွှင့်သွားမယ့် ဇာတ်လမ်းတွေနဲ့မိတ်ဆက်ပေးချင်ပါတယ်နော်။

1.My Unfamiliar Family

ဒီကားလေးကတော့ သူငယ်ချင်းနဲ့မိသားစုကြားက ဆက်ဆံရေးတွေကို အဓိကထားပြီးရိုက်ထားတာဖြစ်ပါတယ်။ အဓိကသရုပ်ဆောင်အနေနဲ့ မင်းသမီး Han Ye-ri ကပါဝင်သရုပ်ဆောင်ထားပါတယ်။ သူက ဒီကားထဲမှာ မိသားစုတစ်စုရဲ့ ဒုတိယမြောက်သမီးဖြစ်ပြီး သူ့မိသားစုနဲ့ ရင်းရင်းနှီးနှီးမနေတတ်တဲ့သူလည်းဖြစ်ပါတယ်။ သူ့မိသားစုက သူ့အတွက် သူစိမ်းဆန်သလို ဖြစ်နေပြီး သူ့ရဲ့အရင်းနှီးဆုံးသူငယ်ချင်း ကိုပဲသူကယုံကြည်ပြီး သူ့ရဲ့ မောင်နှမတွေထက်တောင်ပိုပြီး ရင်းနှီးတာဖြစ်လို့ အကိုတစ်ယောက်လို သတ်မှတ်ထားတဲ့သူလည်း ဖြစ်ပါတယ်။ ဒီကားလေးကို ခြုံပြောရရင်တော့ အခုခေတ် မိသားစူအချို့မှာ တွေ့မြင်နေရသလိုမျိုး အသက်တွေကြီးလာတာနဲ့အမျှ အချင်းချင်း စိတ်တွေဝေးသွားကြသလိုမျိုးပါ။ ဒီလိုမျိုးဖြစ်နေတဲ့ မိသားစုတစ်စုအတွက် အချင်းချင်းဘယ်လို ပြန်စည်းလုံးမလဲဆိုတာ စိတ်ဝင်စားဖို့ကောင်းပါတယ်နော်။ မိသားစုကားတွေကြိုက်တဲ့သူလေးတွေ ကြည့်သင့်ပါတယ်နော်။ ဒီကားလေးကိုတော့ ဇွန်လ(၁)ရက်နေ့မှာ စပြီးထုတ်လွှင့်နေပြီ ဖြစ်ပါတယ်။

2.Backstreet Rookie

ပရိတ်သတ်ကြီးရဲ့အချစ်တော် မင်းသားချောလေး Ji Chang Wook နဲ့ မင်းသမီးချောလေး Kim Yoo Jung တို့ရဲ့ ဇာတ်လမ်းကလည်း ဇွန်လ(၁၂)ရက်နေ့မှာ ထုတ်လွှင့်တော့မှာ ဖြစ်ပါတယ်။ နာမည်ကြီးWebtoonကိုအခြေခံပြီး ရိုက်ကူးထားတာဖြစ်ပါတယ်။ အသက်(၁၀)နှစ်လောက်ကွာတဲ့ သူတို့နှစ်ယောက်ရဲ့ ပထမဆုံးအတူတူ တွဲပြီးသရုပ်ဆောင်ထားတာဖြစ်ပြီး ဒီကားထဲမှာလည်း အသက်ကွာတဲ့ သူတို့နှစ်ယောက်ဘယ်လိုပုံစံနဲ့ ပရိတ်သတ်တွေအသည်းကို ဖမ်းစားသွားဦးမလဲဆိုတာ စိတ်ဝင်စားစရာပဲနော်။ Ji Chang Wook ကဒီမှာ စတိုးဆိုင်ပိုင်ရှင်ဖြစ်ပြီး Kim Yoo Jungကတော့ Ji Chang Wook ရဲ့ဆိုင်မှာအချိန်ပိုင်းအလုပ်လုပ်နေတဲ့ ကျောင်းသူကောင်မလေးပါ။ ဒီကားလေးက အချစ်ဟာသဇာတ်မြူးကားလေးလည်း ဖြစ်လို့ ဘယ်လိုအခွီတွေလာမလဲဆိုတာ စောင့်ကြည့်လိုက်ရအောင်နော်။

3.In Seoul: Season(2)

ဒီကားလေးကတော့ ကျောင်းသားကားလေးဖြစ်ပြီး လူငယ်ကြိုက်ဇာတ်လမ်းလေးပါ။ Fansတွေကလည်း ဒီကားထဲကအဓိကသရုပ်ဆောင် Min Do Hee ရဲ့ဇာတ်ရုပ်ကို အရမ်းကြိုက်ကြပြီး သူနဲ့သူ့အမေရဲ့ Relationshipကို အရမ်းသဘောကျကြတာပါ။ Season(1) မှာ Min Do Hee နဲ့ Kim Yeon Seo တို့က တက္ကသိုလ်ရောက်တော့ အခန်းဖော်တွေ ဖြစ်လာပါတယ်။ သူတို့နှစ်ယောက်ရဲ့ Friendship ပုံစံလေးတွေကိုလည်း မြင်ရမှာ ဖြစ်ပါတယ်။

4.It’s Okay to Not Be Okay

Kim Soo Hyun နဲ့ မင်းသမီး Seo Ye Ji တို့ရဲ့ဒီကားလေးကလည်း ပရိတ်သတ်တွေအားလုံးက ရင်ခုန်စွာနဲ့စောင့်မျှော်နေကြတာဖြစ်ပါတယ်။ အချစ်ဆိုတာကို အယုံအကြည်မရှိ၊ မချစ်တတ်တဲ့သူတို့နှစ်ယောက်ရဲ့ နောက်ကွယ်မှာ စိတ်ဝင်စားစရာ Character လေးတွေရှိပါတယ်။ Moon Kang Tae(Kim Soo Hyun) က စိတ်ရောဂါအထူးကုဌာနရဲ့ ကျန်းမာရေးဝန်ထမ်းတစ်ယောက်ဖြစ်ပါတယ်။ နေ့စဉ် လူနာတွေရဲ့ အခြေအနေတွေကို လိုက်မှတ်ရပြီး လူနာတွေရဲ့ ထူးဆန်းတဲ့အခြေအနေတွေနဲ့ အမြဲကြုံတွေ့နေရပြီး လိုက်ဖြေရှင်းရပါတယ်။ Go Moon Young(Seo Ye Ji) ကတော့ နာမည်ကြီး ကလေးပုံပြင်ရေးတဲ့ စာရေးဆရာမဖြစ်ပြီး တစ်ကိုယ်ကောင်းဆန်ပြီး ရိုင်းစိုင်းတဲ့ကောင်မလေးတစ်ယောက်ပုံစံလေးပါ။ ဒီနှစ်ယောက်က ဘယ်လိုတွေဆုံပြီး ဘယ်လိုစိတ်ဝင်စားစရာကောင်းမလဲဆိုတာ ဇွန်လ(၂၀)ရက်နေ့မှာတွေ့ရတော့မှာပါနော်။