မိန်းကလေးတွေ အားလုံး မိတ်ကပ် ဘယ်လောက်ပဲ လှအောင်လိမ်းခြယ်ပါစေ အောက်ခံ အသားအရေ မကောင်းရင် ဘယ်လိုမှ အဆင်မပြေပါဘူးနော်။ ပျိုမေတို့အားလုံး ပိုင်ဆိုင်ချင်ကြတဲ့ glass skin ကို ရရှိအောင် ဘယ်လို ပြုလုပ်ရမလဲ ဆိုတာကို တင်ဆက်ပေးလိုက်ပါတယ်။

(၁) Double Cleansing

Glass skin ပိုင်ဆိုင်ချင်တဲ့ ပျိုမေတို့ အတွက် ပထမဆုံး အရေးကြီးတဲ့ အချက်ကတော့ မျက်နှာသေချာသစ်ဖို့ လိုအပ်တာပဲ ဖြစ်ပါတယ်။ မျက်နှာသစ်တဲ့ နေရာမှာလည်း အပြင်းစား မျက်နှာသစ် ဆပ်ပြာတွေကို အတတ်နိုင်ဆုံး ရှောင်သင့်ပါတယ်။ ညအိပ်ရာ မဝင်ခင်မှာတော့ မိတ်ကပ်တွေကို သေချာဖျက်ပြီး မျက်နှာကိုစင်ကြယ်အောင် သစ်ဖို့ လိုအပ်ပါတယ်။ မျက်နှာသစ်ရင်လည်း facial foam ကိုလိုအပ်တဲ့ ပမာဏ ထက်ပိုပြီး အသုံးမပြုသင့်ပါဘူးနော်။ ရေနွေးအပူကြီး နဲ့ မျက်နှာသစ်တာကလည်း သင့်အသားရေ ကို ခြောက်သွေ့ စေတတ်ပါတယ်။

(၂) Exfoliate

ဒီတစ်ဆင့်ကတော့ နေ့တိုင်း လုပ်စရာ မလိုတဲ့ မျက်နှာဂျီးချွတ်တဲ့ အဆင့်ပဲ ဖြစ်ပါတယ်။ ဘယ်လောက်ပဲ မျက်နှာကို စင်ကြယ်အောင်သစ်သစ် မမြင်နိုင်တဲ့ ချွေးပေါက်တွေထဲမှာ ဖုန်မှုန့်တွေ ဂျီးတွေ ရှိနေတတ်ပါတယ်။ အဲ့တာကြောင့် ဘယ်လောက်ပဲ skin care တွေလိမ်းလိမ်း glass skin ဖြစ်မလာတဲ့ အချက်က မျက်နှာဂျီးချွတ်တာ မပြုလုပ်လို့ပါ။ တစ်ပတ်ကို ၂ ခါ မျက်နှာဂျီးချွတ်ဖို့ လိုအပ်ပါတယ်နော်။

(၃) Sheet Mask

Glass skin ဖြစ်အောင် အထောက်အကူပြုမယ့် နောက်တစ်ချက်ကတော့ sheet mask ကပ်ပြီး ရေဓာတ်ဖြည့်ပေးတာပဲ ဖြစ်ပါတယ်။ အခုဆိုရင် Sheet mask တွေမျိုးစုံထုတ်နေကြပြီမလို့ ကိုယ့်အသားအရေနဲ့ လိုက်ဖက်မယ့် sheet mask ကိုရွေးချယ်ပြီး ကပ်ပေးရုံပဲနော်။ ဒီတဆင့်ကိုကြတော့ ၂ရက်ခြား တစ်ခါ ပြုလုပ်ပေးသင့်ပါတယ်။

(၄) Toner

အဓိက မျက်နှာသစ်ပြီးရင် Toner လိမ်းပေးရမယ်နော်။ Toner က မျက်နှာကို ထပ်မံသန့်စင်ပေးတဲ့ အရည်တစ်မျိုး ဖြစ်ပါတယ်။ မျက်နှာသစ်ပြီး ရင်တောင် ကျန်နေတဲ့ အညစ်အကြေးတွေကို toner က ကောင်းကောင်း ဖယ်ရှားပေး နိုင်ပါတယ်။ နောက်ပြီး အဆီပြန်ခြင်း လည်း ကင်းဝင်း စေနိုင်ပါတယ်။ Toner မှာလည်း အဆီပြန်တဲ့ အသားအရေ အတွက်၊ ဝက်ခြံ ပေါက်တတ်တဲ့ အသားအရေ အတွက်၊ အသားခြောက် တတ်တဲ့ အသားအရေ အတွက် စသဖြင့် အသားအရေ အလိုက် အမျိုးအစား များစွာရှိပါတယ်။

(၅) Moisturizer

နောက်ဆုံး အဆင့်အနေနဲ့ အရေးကြီးဆုံး အချက်ကတော့ ရေဓာတ်ပြည့်၀ အောင် moisturizer လိမ်းပေး ရမှာ ဖြစ်ပါတယ်။ Moisturizer ကို နေ့စဉ် ပုံမှန်လိမ်းပေး သင့်ပါတယ်။ မျက်နှာက ရေဓာတ်ပြည့်၀ နေမှ စိုစိုကြည်ကြည်လေးနဲ့ glass skin ကိုပိုင်ဆိုင်နိုင် မှာနော်။

ကဲ…….ပျိုမေတို့ရေ glass skin ပိုင်ဆိုင်ချင်တယ် ဆိုရင်တော့ အပေါ်က အရေးကြီးဆုံး ၅ချက်ကို သေချာလေး လိုက်လုပ်ကြ ရအောင်နော်။